Моннан 60-70 ел элек Илһам да гади бер егет булган…

Миңа бер 60-70 ел ИРТӘРӘК туасы булган! Җомга Илһам абый Шакировны соңгы юлга озатканда, шундый фикергә килдем.

60-70 ел элек татар җыр сәнгатенең дә, татар мәдәниятының да иң шанлы, иң затлы чоры булган!.. Хәзерге көнгә алыштыргысыз зәвыклы чоры! Сабантуйларда халык мәйданга ашкынып торган, авыл урамнарында милли көйләр агылган. Капка төпләрендә гармунчылар, баянчылар өздереп уйнаган. Кешеләр чын хатлар алышканнар, бәйрәмнәргә открыткалар җибәрешкәннәр!.. Җәен, мең газап кичереп, әмма шул газаплы эштән дә күңел көрлеге табып, печәнгә чыкканнар. Егетләр чын егет булган, кызлар чын кыз булган!.. Клубларда концерт-спектакльләр куелган, мәгънәле! җырлар җырланган.

Күңелем белән мин бүгенге көн кешесе түгел. Миңа гаджет-фәләннәрсез аралашу, капка төбендә таң атканчы серләшү кадерле! Ә гармунда, баянда уйный белүчеләргә, гомумән, сокланып туя алмыйм!

Сабантуйларының да халык өчен эшләнүен көтәм! «Тизрәк уздырып җибәрик»,- дигән девиз белән бер көнгә 5 күрше авылда Сабантуе кую, кар яуса да, боз яуса да бәйрәмне үткәрү, ашык-пошык уен уйнату, «Әйдә, чык инде уенга!» — дип ялынып йөрүче оештыручыларны күрү канымны кайната.

Мин туарга тиешле 60-70 ел элек булган чорда бар да башкача булган. Кешеләр гади булган, ач булсалар да, мәдәниятны, җыр-моңны югалтмаганнар, күңелләрен тапландырмаганнар.

…Моннан 60-70 ел элек Илһам да гади бер егет булган. Күкрәк киереп җырлаучы, моңын һәр кешенең йөрәгенә алып барып җиткерүче гади җырчы. Ул чорның һәр җырчысы ҖЫРЧЫ булган, үз юлына тугры калган җырчы!.. Мин туарга теләгән ул чорның һәр иҗат әһеле — легенда!..

Ә бүгенге көн куркыта…

Комментарий язарга